بس انتى زي القمر ..انا مش بعاكس
صفاء مصطفى
دي كانت الجملة اللي دخلت الفنانة مديحه كامل عالم التمثيل في منتصف الستينات وخلانا نشوف واحدة من اجمل نجوم السينما المصرية.
بيحكي الفنان الراحل سمير غانم انه كان شخص خجول بطبعه لكن المرة الوحيدة اللي تجرأ وراح كلم واحدة ما يعرفهاش حصلت لما كان في اسكندرية وشاف طالبة جميلة راجعة من الكلية وحاضنة الكتب عشان يلاقي نفسه متثبت قدامها ويقولها انها اد ايه هى جميلة ومش بس كده .. عرض عليها التمثيل ووافقت عشان ياخدها معاه تعمل اسكتشات على مسرح الجامعة ونجحت جد لدرجة انه قال "قلبت الصالة والجمهور فضل مبحلق في الصالة".
حتى انطلقت مديحة في ادوار صغيرة لحد ما اخدت دور كبير في فيلم "30 يوم في السجن" والفيلم نجح جدا عشان تستمر رحلتها الكبيرة لغاية سنة 92 لما كانت بتعمل فيلم "بوابة إبليس" تعبت فجأة ودخلت المستشفى عشان بعد خروجها تقرر انها تعتزل الفن بشكل نهائي ورفضت تصوير باقي مشاهدها عشان يضطر المخرج عادل الاعصر انه يستخدم دوبليرة مكانها عشان يكمل الفيلم واضطر المنتج يرفع عليها قضية لكن يقال ان تنازل عنها في الاخر.
بعد خمس سنين وفي 13 يناير 97 .. رحلت مديحة كامل عن عالمنا بعد متاعب في القلب عانت منها على مدار 22 سنة ولكنها اثرت على الرئة غير انها اصيبت بسرطان الثدي عشان ترحل في هدوء عن عمر 50 سنة.
تعليقات
إرسال تعليق