الاسم الحقيقي لفاتن حمامة

صفاء مصطفى 

عندما عرفت ام فاتن حمامة انها حامل وبما انها كانت تعبانة من تربية 3 ولاد قررت أنها تنزل الجنين اللى فى بطنها ..ولما حكت لجوزها الاستاذ احمد حمامة الموظف بوزارة المعارف وافقها.. وقالها توكلى على الله لانه كان شايف قد ايه هى تعبانة فى تربية ولادها.

لكن قبل التنفيذ ام فاتن شافت فى المنام غية الحمام اللى فى بيتها بتوسع وفى حمام كتير فيها ولمحت حمامة كبيرة شايلة فى بقها حمامة صغيرة وبتنزل بيها وسط الحمام..

يومها صحيت الست من النوم وصحت جوزها حكت له اللى شافته فسألها ده معناه ايه ؟ فقالت إن اللى فى بطنها تبقى بنت وأنها هتبقى جميلة زى الحمامة البيضا اللى شافتها .. وعنها.. قررت الست أنها مش هتنزل الجنين وتحتفظ بيه.

مرت الشهور وجه اليوم المنتظر.. وكان الاستاذ حمامة راجع من شغله فسمع زغاريط جيه من جو البيت فعرف أن مراته ولدت.. واول ما دخل عليها قالت له:: شايف البنت جميلة ازاى.. انا سمتها سعاد.

وراح الحاج احمد تانى يوم علشان يسجل سعاد لكن مالقاش موظف السجل فقال اجيله بكرة.. ورجع البيت لقى ابنه منيم عروسته اللى مسيمها فاتن جنب اخته سعاد.. ولقى مراته واقفه تبحلق فى العروسة وفى سعاد .. ولما عرفت ان جوزها مالحقش يسجل الاسم قالت له خلاص هنسميها فاتن.. ورغم ان الاسم مكنش منتشر وقتها ورغم ان الاب مكنش مرحب فى البداية لكنه استجاب لرغبة مراته وراح تانى يوم سجل بنته بإسم فاتن أحمد حمامة.

رحم الله الفنانة القديرة فاتن حمامه ووالديها