فريد الاطرش..ليلى مراد رغم نجوميتهم ليه ما اشتغلوش مع بعض!!

صفاء مصطفى 

"هو ليه فريد الأطرش وليلى مراد ما اشتغلوش مع بعض"

كما ذكر فى عدد من أعداد مجلة الموعد اتكلمت المجلة عن هذا السؤال  الشاغل بال ناس كتير وقتها  رغم نجومية الاتنين ورغم أن كل واحد فيهم اشتغل مع كبار النجوم؟..

وكما طرحت المجلة السؤال .. طرحت كمان الإجابة وقالت إن في أسباب حالت دون تعاون النجمين مع بعض..

السبب الأول.. كان غيرة أنور وجدي.. الغيرة الشخصية والفنية.. لأن أنور كان بيغير على ليلى من أي نجم .. وسبق وعمل معاها مشكلة لما قررت تشتغل مع أحمد سالم ووصلت المشكلة بينهم إلى التهديد بالطلاق.. ده بخلاف الغيرة الفنية واللي خلته ـ بحسب المجلة ـ يقنعها بإن أفلامها معاه هى بس اللي بتنجح وتحقق صدى واسع عند الجماهير..

هنا نستوقف ونسأل  "طيب ليلى وأنور اتطلقوا فى أوائل الخمسينيات .. ليه بقى ما اشتغلتش مع فريد بعدها؟".. 

بترد الموعد على السؤال ده برضه .. وبتقول إنه بعد الطلاق حصل واجتمع وجيه أباظة مدير شركة النيل للسينما مع ليلى وفريد.. وعرض على الاتنين بطولة فيلم من إنتاج الشركة .. والاتنين وافقوا لكن الشركة واجهت مشاكل إنتاجية اتسببت فى إلغاء المشروع..

وبعد سنين حاول رمسيس نجيب إنه يجمع فريد وليلى فى فيلم "دعني لولدي" قصة إحسان عبدالقدوس.. لكن ليلى وقتها فاجئته بإنها مش عايزة ترجع تاني للوسط الفني..

وفى سنة 1961 رشح بركات ليلى مراد علشان تشارك فريد فيلم "شاطئ الحب".. لكن وقتها اكتشفوا إن اسم ليلى مراد على اللايحة السودا فى سوريا اللي منعت عرض أفلامها وإذاعة أغانيها .. فتم التراجع عن المشروع..

وبعد الواقعة  بعشر سنين وكام شهر.. وبعد تردد طويل من ليلى مراد وافقت أخيرا على عرض مؤسسة السينما بإنها تقدم فيلم مع فريد الأطرش.. ومضت ليلى العقد وكان المفروض تغنى فى الفيلم ديو  مع فريد.. ده غير أغاني فردية لكل واحد منهم .. لكن اللي حصل إن فريد تعب والمشروع فضل يتأجل لحد ما مات..