هالة صدقي:"شادية" بالنسبة ليا تحدي بيني و محمد سامي

صفاء مصطفى 

 خلال مداخلة هاتفية في برنامج "إحنا لبعض"، مع الإعلامية نهال عبر فضائية "صدى البلد": تحدثت الفنانة هالة صدقي عن مشاركتها في مسلسل "إش إش".

"شادية" بالنسبة ليا تحدي بيني أنا والأستاذ محمد سامي أن بعد "صفصف" هنقدم إيه، محمد سامي عرض عليا دور إنتصار "إخلاص كابوريا" و"شادية" وقالي اقري وشوفي شايفه نفسك فين، يمكن دور "إخلاص كابوريا" ممكن يبقى أطول وأهم لكن دور "شادية" عمري ما عملته"

وتابعت هالة صدقي متحدثه عن محمد سامي: "محمد سامي لا يقل عن المخرجين الكبار زي يوسف شاهين وعاطف الطيب، اللي بيحب شغله وعايز من أبسط واحد لأكبر واحد يبقى حاسس بأهمية العمل اللي بيعمله هو ممكن يتعصب زي باقي البشر أنه ميلاقيش الناس دي على نفس القدر، هو بيحب الحاجة مظبوطة وعايز الإنسان اللي قدامه جاهز وحافظ ومقدر المجهود اللي بيعمله".

وعن الشخصية التي تقدمها وصفتها قائلة: ""شادية" كانت بتحب جوزها في الأول لكن بسبب أنه صدها كتير بقت ست عملية مش شريرة هي عايزة تعمل فلوس لأولادها لأنها ضيعت عمرها وشبابها مع جوزها وشايفه أن الفلوس دي حقها، لأنها سرقت الفلوس معاه من الأول فحاسه أن دا حقها".

وعن الانتقادات التي وجهت لمسلسل "إش إش" كون البطلة تظهر في دور راقصة: "إحنا بدل الرقص محتشمة جدا مفيش أي حاجة باينة لأن مش هو دا موضوع المسلسل، المسلسل بيركز على الحياة الاجتماعية ومن ضمنهم مجال راقصات اللي إحنا منعرفش عنه حاجة".